Tölvudeildin vinnur nú að því að uppfæra hinn glæsilega, sumir myndu segja klassíska, Bjartsvef. Tölfræðingar hafa verið kallaðir til, til að greina helstu gögn; Nú er til dæmis verið að skoða skrá  yfir lykilorð sem fólk hefur slegið inn á leitarvélar síðustu þrjá mánuði, áður en það svo ákveður að heimsækja vefinn Bjartur punktur is. Það kemur kannski ekki á óvart að langlaaangflestir hafa einfaldlega slegið inn "Bjartur" áður en þeir skella sér inná Bjartsvefinn. Topp tíu lítur svona út:

1. Bjartur
2. Karlar sem hata konur
3. Loftkastalinn sem hrundi
4. Jón Kalman
5. Bjartur bókaforlag
6. Harmur englanna
7. Harry Potter
8. Neon bækur
9. Týnda táknið
10. Votlendi

Það vekur athygli að Stúlkan sem lék sér að eldinum kemst ekki á skrá, en greinilega hafa margir viljað fræðast um þýsku metsölubókina Votlendi - sem kom út í desember og gagnrýnendur greinir á um hvort þar sé á ferðinni mesta snilld eða argasta klám.

Annars er greinilegt að fólk ratar helst inn á vefinn af því það er að leita að bókartitli eða höfundi: Ingunn Snædal, Eiríkur Guðmundsson, Lilja Sigurðardóttir, Oddný Eir og Hermann Stefánsson eru greinilega gjarnan gúggluð, sem og Ragnar í Smára, en Mynd af Ragnari í Smára eftir Jón Karl Helgason kom út í fyrra. Eins vekur það ekki furðu að "Góð bók," "Bestu bækurnar," og "Besta bókarkápan," vísi heppnum leiðina inn á Bjartsvefinn. En vegir vefsins eru órannsakanlegir og sérstaka athygli vakti að þessi þrjú orð leiddu gesti rakleitt inn á Bjartur punktur is:

1. Rjómatertur
2. Ástarjátning - og síðast, en EKKI síst: 
3. Hannes Hólmsteinn.