Síðasta bókin í Millennium-þríleik Stiegs Larssons, Loftkastalinn sem hrundi, kom út í Ameríku í síðustu viku og er gersamlega að gera allt vitlaust, eða eins og danska pressan segir (en Bjartur er áskrifandi að stórblaðinu Politiken) "Stieg Larsson er en bragende succes i USA." Loftkastalinn sem hrundi er í efsta sæti metsölulista heimsmeistarans í bóksölu, Amazon.com, og Karlar sem hata konur og Stúlkan sem lék sér að eldinum eru í þriðja og fjórða sæti.
Ameríski bókabransinn er bæði hissa og glaður yfir því hvursu Stieg Larsson hefur átt greiðan aðgang að hjörtum amerískra lesenda. Þýddar bækur hafa ekki átt jafn mikilli velgengni að falla síðan "Nafn rósarinnar," eftir Umberto Eco gerði allt vitlaust. Nafn rósarinnar kom út í Ameríku árið 1983.