Fugl dagsins í dag eru þýðingar Jóns Kalmans Stefánssonar á tveimur ljóðum eftir Charles Simic. Simic fæddist í Júgósalvíu árið 1938 en flutti með fjölskyldu sinni til Bandaríkjanna sextán ára gamall. Hann er ljóðskáld, ritgerðahöfundur og þýðandi og hér birtast eftir hann tvö ljóð:

GAFFALL



Þessi undarlegi hlutur hlýtur að hafa skriðið

beint úr helvíti.

Hann líkist fuglsfæti

sem hangir um hálsinn á mannætu.

 

Og þegar þú heldur á honum,

þegar þú stingur honum í matarbita,

þá er mögulegt að ímynda sér afganginn af fuglinum:

höfuð hans, eins og hnefi þinn,

er stórt, sköllótt, neflaust og blint.










ÓVEÐURSKVÖLD



Verðum að binda gamla heiminn okkar betur niður

þegar það verður jafn kalt og hvasst og núna.

Klókindalega máluð leiktjöldin,

æ, það rífur hressilega í þau!

Bráðum falla þau saman.

 

Þá verður ekkert eftir nema óendanlegt tómið.

Óviðjafnanleg þögnin. Almáttug þögnin.

Egypskur himinn, stjörnur eins og kyndlar

grafarræningja á leið inn í grafhvelfingu konungsins.

Jafnvel vindurinn nemur staðar, fylgist með.

 

Best að þú grípir um þetta tré, Lucille.

Það er illa farið, dauðskelft.

Ég held hlöðunni niðri.

Kjúklingarnir eru órólegir.

Slyngir kjúklingar, óstöðug veröld.